اسلام آباد: ( ہم دوست نیوز) وزیراعظم محمد شہباز شریف نے اسلام آباد لاہور موٹر وے پر پیش آنے والے بس حادثہ پر اظہار افسوس کیا ہے۔
ٹوئٹر پر اپنی ایک ٹویٹ میں وزیراعظم میاں محمد شہباز شریف نے کہا ہے کہ کلر کہار پر بس حادثہ کے نتیجہ میں ضائع ہونے والی انسانی جانوں پر دلی طور پر بے حد رنجیدہ ہوں، سالٹ رینج پر حادثات کا تواتر کے ساتھ ہونا انتہائی پریشان کن ہے۔
انہوں نے ہدایت دیتے ہوئے کہا ہے کہ موٹروے حکام اس امر کو یقینی بنائیں کہ موٹر وے پر چلنے والی گاڑیاں ان کے سفر کے قابل ہوں اور ڈرائیور حضرات ڈرائیونگ کے تمام معیاروں پر پورے اترتے ہیں۔
وزیراعظم شہباز شریف کا مزید کہنا ہے کہ قواعد و ضوابط پر سختی کے ساتھ عمل کر کے ہی سفر کو محفوظ ترین بنایا جا سکتا ہے، میری تمام ہمدردیاں اور تمام دعائیں ان خاندانوں کے ساتھ ہیں جن کے عزیز اس دردناک حادثے میں ان سے بچھڑ گئے ہیں ۔
