لاہور: ( ہم دوست نیوز ) لاہور کی احتساب عدالت نے پاکستان کے سابق وزیر اعظم نواز شریف کی پلاٹ الاٹ منٹ کيس ميں بريت کا تفصیلی فيصلہ جاری کر دیا ہے ۔
تفصیلی فیصلے میں یہ کہا گیا ہے کہ میاں محمد نوازشریف کو اشتہاری قرار دینے کی کارروائی قانون کے مطابق نہیں ، ریکارڈ سے پتہ چل رہا ہے کہ نوازشریف کو سیاسی انتقام کانشانہ بنایا گیا تھا، عدالت 3 بار منتخب ہونے والے وزیراعظم میاں محمد نوازشریف کو بری کرنے کا حکم دیتی ہے، سابق حکومت نے نیب کو میاں محمد نوازشریف کا مستقبل تباہ کرنے کے لیے ریفرنس پر مجبور کیا تھا ۔
فیصلے میں مزید یہ بھی کہا گیا ہے کہ عدالتی معاون نے کہا ہے کہ مرکزی ملزمان کو جو ریلیف دیا گیا وہی نوازشریف کو بھی ملنا چاہیے، مرکزی ملزمان کےساتھ اشتہاری بھی اسی سزا یا پھر ریلیف کا مستحق ہوتا ہے، سپریم کورٹ کے فیصلے کی روشنی میں سابق وزیراعظم کو بھی وہی ریلیف ملنا چاہیے تھا جو کیس کے دیگرملزمان کو دیا گیا۔
تفصیلی فیصلے کے مطابق ریونیو بورڈ اور نیب کو نواز شریف اور ان کی جائیدادوں میں حصہ داروں کی جائیدادوں کو غيرمنجمد کرنے کا حکم دیتی ہے، عدالتی فیصلے کی کاپی چیئرمین نیب سمیت دیگرکو بھی ارسال کر دی جائے۔
