اسلام آباد: ( ہم دوست نیوز ) وزیر اعظم میاں شہباز شریف نے مادر ملت فاطمہ جناح کو ان کے 56 ویں یوم وفات پر خراج عقیدت پیش کرتے ہوئے کہا ہے کہ محترمہ فاطمہ جناح ایک عظیم بھائی کی عظیم ترین بہن تھیں ، جو پاکستانی قوم کیلئے ماں کا درجہ رکھتی ہیں۔
اپنے بیان میں وزیراعظم میاں محمد شہباز شریف نے کہا کہ قوم پر محترمہ فاطمہ جناح کے بہت سے احسانات ہیں، فاطمہ جناح بابائے قوم کے لئے حوصلہ اور ہمت کا ذریعہ تھیں، مادر ملت پیرانہ سالی کے باوجودبھی آمریت کے خلاف ڈٹ گئیں، عوام، جمہوریت اور ملک کے لیے انہوں نے تاریخی کردار ادا کیا۔
وزیراعظم نے مزید کہا کہ فاطمہ جناح نے تحریک پاکستان اور ملک پاکستان کے لیے بے مثال کردار ادا کیا ہے اور قربانیاں دی ہیں ، فاطمہ جناح کی شخصیت آج کی بچیوں اور تمام خواتین کے لیے مشعل راہ ہے، قوم مادر ملت کی پاکستان کے لیے خدمات کو خراج عقیدت پیش کرتی ہے اور ہمیشہ فاطمہ جناح کے احسانات کی مقروض رہے گی۔
