کراچی : ( ہم دوست نیوز) کراچی کے علاقے لیاری بہار کالونی میں نامعلوم افراد نے میڈیکل سٹور پر فائرنگ کر دی ، جس سے سٹور مالک جاں بحق ہو گیا جب کہ اس کے 2 بیٹے زخمی ہوگئے ہیں ۔
پولیس ذرائع کے مطابق نامعلوم ملزمان نے میڈیکل اسٹور پر اندھا دھند فائرنگ کردی اور پھر پیدل فرار ہوگئے ، فائرنگ سے نور محمد نامی شخص موقع پر جاں بحق ہوگیا جبکہ اس کے دو بچے ایک گیارہ سالہ اسماعیل اور دوسرا 10 سالہ شہزاد زخمی ہو گئے ہیں۔
پولیس ذرائع کے مطابق فائرنگ کا واقعہ ٹارگٹڈ لگ رہا ہے، ملزمان نے مقتول سے کوئی لوٹ مار بھی نہیں کی بلکہ صرف مقتول کو فائرنگ کا نشانہ بنایا اور قتل کر کے فرار ہوگئے۔
مقتول نور محمد کے کزن میر واعظ کا کہنا ہے کہ واقعہ کے وقت علاقے کی لائٹ گئی ہوئی تھی اور دونوں بچے بھی والد کے ساتھ اسٹور پر تھے، نور محمد کا آبائی تعلق کوئٹہ سے ہے جب کہ اسکی بیوی اپنے رشتہ دار کی شادی پر کوئٹہ گئی ہوئی ہے ۔
