کراچی: ( ہم دوست نیوز) وفاقی تحقیقاتی ادارے نے کراچی ائیرپورٹ پر کارروائی کے دوران جعلی وزٹ ویزے پر کینیڈا جانے والے ایک مسافر کو گرفتار کر لیا ہے۔
ترجمان ایف آئی اے کا کہنا ہے کہ ایف آئی اے امیگریشن کے عملے نے جعلی وزٹ ویزے پر کینیڈا کے لیے جانے والے مسافر کو آف لوڈ کر لیا اور پوچھ گچھ کے دوران مسافر کی نشان دہی کرنے پر ائیرپورٹ سے مذکورہ ایجنٹوں کو گرفتار کر لیا گیا ہے ۔
مسافر فلائٹ نمبر پی کے 783 سے کینیڈا کے لیے جا رہا تھا اور مسافر کے پاکستانی پاسپورٹ پر کینیڈا کا جعلی ویزا لگا تھا،ابتدائی تفتیش کے مطابق مسافر نے مذکورہ ویزا ایجنٹ سے ویزا حاصل کیا تھا اور اس کے لیے مسافر نے ایجنٹ کو 20 لاکھ روپے بھی آن لائن ٹرانسفر کیے تھے۔
مسافر کی نشان دہی کرنے پر ایجنٹ سالک شریف اور فیاض حسین کو بھی گرفتار کیا گیا ہے ۔
