وزیرآبپاشی سندھ سہیل انور سیال نے لاڑکانہ پریس کلب میں پریس کانفرنس کرتے ہوئے کہا کہ سندھ میں اس وقت پانی کی 67 فیصد کمی ہے۔
تفصیلات کے مطابق وزیرآبپاشی سندھ سہیل انور سیال نے لاڑکانہ پریس کلب میں پریس کانفرنس کرتے ہوئے کہا کہ پانی معاہدے پر تھری ٹرائل فارمولا موجود ہی نہیں ہے ارسا اس پر غلط بیانی کر رہی ہے۔
انہوں نے مزید کہا کہ سندھ میں پانی کی چوری کے معاملے پر کارروائی کرکے 20 مقدمات دائر کئے گئے ہیں اور جہاں پر شکایت مل رہی ہیں وہاں پر کاروائیاں کی ہیں ، روٹیشن کی شکایات مل رہی ہیں ان کو جلد حل کیا جائے گا۔
وزیرآبپاشی سندھ نے کہا کہ پانی کے معاملے پر پیپلز پارٹی سندھ اسمبلی ، قومی اسمبلی سمیت سینیٹ میں آواز اٹھاتی رہی ہے۔
سہیل انور سیال نے کہا کہ چشمہ بیراج پر 17 فیصد پانی ضائع ہو رہا ہے لیکن ہمارے حصہ کا نہیں دیا جا رہا۔
انہوں نے یہ بھی کہا کہ وزیر اعظم سے ملاقات کے دوران پانی کے معاملے پر بات کی تھی لیکن وہ اس حد تک غیر سنجیدہ نکلیں گے اندازہ نہیں تھا۔
وزیرآبپاشی سندھ نے کہا کہ ارسا کا کام ہے پانی کی یکساں تقسیم کرنا مگر ارسا تھری ٹرائل فارمولے کا جواز بنا کر پانی کی کمی کر رہا ہے۔
سہیل انور سیال نے کہا کہ ہم دوسرے صوبوں کا پانی نہیں مانگ رہے بلکہ صرف اپنے صوبے کا حصہ مانگ رہے ہیں۔
