جاوید اختر مودی حکومت پر کیوں برس پڑے؟

(ہم دوست نیوز):جاوید اختر مودی حکومت پر کیوں برس پڑے؟

آن لائن مسلم خواتین کی نیلامی پر بھارت کے نغمہ نگار جاوید اختر کا سخت ردعمل سامنے آ گیا ہے۔ سماجی رابطے کی مائیکرو بلاگنگ ویب سائٹ ٹوئٹر پر جاوید اختر نے ایک بیان جاری کیا ہے۔ بھارت کے معروف نغمہ نگار جاوید اختر نے مودی کو آڑے ہاتھوں لیا۔ انہوں نے کہا کہ میں سب کی خاموشی پر حیران ہوں۔خاص کر پی ایم مودی کی خاموشی پر۔

جاوید اختر نے وزیر اعظم مودی سے سوال کرتے ہوئے پوچھا کہ کیا “سب کا ساتھ” یہی ہو رہا ہے؟ سینکڑوں خواتین کی آن لائن نیلامی ہورہی ہے۔نام نہاد دھرم سنسد فوج اور پولیس کو تقریباً 20 کروڑ ہندوستانیوں کا قتل عام کرنے کا مشورہ دے رہی ہے۔

ان کی جانب سے اس بیان کے بعد انہیں سوشل میڈیا پر سخت تنقید کا نشانہ بنایا جارہا ہے۔دوسری جانب بھارت میں شدید غم و غصے کے بعد مسلم خواتین کی آن لائن نیلامی کرنے والی ویب سائٹ کو بند کردیا گیا ہے۔جبکہ نیلامی کرنے والے بھارتی شخص کو بھی گرفتار کر لیا گیا ہے۔

بھارتی پولیس نے 21 سالہ شخص کو گرفتار کیا ہے۔جس کی شناخت تاحال ظاہر نہیں کی گئی ہے۔تاہم اس شخص کو انجینئرنگ کا طالب علم بتایا جارہا ہے۔جبکہ اس شخص کا تعلق بھارت کے جنوبی شہر بنگلور سے ہے۔ اس ویب سائٹ کو بھی بند کر دیا ہے۔اس ویب سائٹ کے عملی اشارے نہیں ملے۔اس ویب سائٹ کا مقصد مسلم خواتین کو ہراساں و پریشان کرنا تھا۔

واضح رہے کہ بھارت میں ایک سال کے دوران ایسی دوسری ویب سائٹ سامنے آئی ہے۔اس جعلی ویب سائٹ پر پاکستان کی نوبل انعام یافتہ ملالہ یوسفزئی سمیت بھارتی مسلمان صحافی عصمت آرا ، بھارتی اداکارہ شبانہ اعظمی اور سینکڑوں خواتین کو نیلامی کے لیے پیش کیا گیا تھا۔