کراچی:(ہم دوست نیوز) گزشتہ روز سے کراچی کے مختلف علاقوں میں وقفے وقفے سے تیز بارشوں کا سلسلہ جاری ہے، جس کی وجہ سے متعدد علاقوں میں پانی جمع ہو نے سے نظام زندگی درہم برہم ہو گیا ہے۔
تفصیلات کے مطابق چیف میٹرولوجسٹ سردار سرفراز کا کہنا ہے کہ آج بھی شہر میں کہیں تیز اور کہیں ہلکی بارش کا امکان ہے، جبکہ آج دوپہر کے بعد سے مون سون سسٹم کی شدت میں کمی کا امکان ہے۔
ملک کے مختلف شہروں میں موسلادھار بارش
انہوں نے کہا کہ ماہ جولائی کا متوقع مون سون سسٹم بظاہر زیادہ شدت کا نہیں لگ رہا۔
چیف میٹرولوجسٹ سردار سرفراز کا کہنا ہے کہ بارش کا موجودہ اسپیل 26 جولائی تک جاری رہنے کا امکان ہے۔
محکمہ موسمیات کا کہنا ہے کہ 30 جولائی سے ایک اور سسٹم کراچی پر اثر انداز ہو نے کا امکان ہے۔
دوسری طرف شہر قائد میں مسلسل بارش کے باعث فلائٹ آپریشن بھی متاثر ہوا ہے۔ کراچی جانے اور آنے والی درجن بھر پروازیں منسوخ کر دی گئی ہیں ،جبکہ ان میں سے کئی تاخیر کا شکار ہیں۔
