(ہم دوست نیوز): فلم دیکھیں لیکن تبصرہ نہ کریں۔۔۔فہد مصطفیٰ
یوں لگتا ہے کہ ملک میں اب زبان کے ساتھ ساتھ قلم پر بھی تالے ڈالے جائیں گے۔ سیاست دانوں کی طرح اب اداکاروں نے بھی لکھنے والوں کے قلم کو اپنی مرضی سے چلانے کی تحریک شروع کردی ہے۔
مشہور اداکار فہد مصطفیٰ اپنے انسٹاگرام پر ایک تحریر شئیر کرتے ہیں جس میں ان کا کہنا ہے کہ “مؤدبانہ گزارش ہے کہ بلاگرز فلم ضرور دیکھیں لیکن اس پر تصرہ نہ لکھیں کیونکہ برے یا اچھے تبصرے کسی بھی طرح سینما انڈسٹری کی مدد نہیں کرتے۔ لوگوں کو ان کی مرضی کے مطابق سینما جاکر فلمیں دیکھنے دیں۔”
انھوں نے مزید لکھا کہ “فلم انڈسٹری کو آپ کی سپورٹ کی ضرورت ہے اور لوگوں کو یہ فیصلہ کرنے دیں کہ فلم دیکھنے لائق ہے کہ نہیں”
لگتا ہے کہ یہ بات لکھتے ہوئے فہد مصطفیٰ بھول چکے ہیں کہ بلاگرز بھی فلم دیکھ کر ہی تبصرہ کرتے ہیں۔ فلم انڈسٹری کوئی خیراتی ادارہ نہیں جسے سپورٹ کے ذریعے چلایا جائے بلکہ لوگ اپنی جیب سے پیسے دے کر ٹکٹ خریدتے ہیں اور معیاری تفریح ملنا ان کا حق ہے۔
ایسی صورت میں اگر کوئی بلاگر فلم دیکھ کر اپنا تبصرہ لکھتا ہے تو اسے روکنا کسی بھی طرح مناسب نہیں ہے۔ ایک آرٹسٹ اور اداکار کی حیثیت سے اداکاروں کا کام اچھی تفریح مہیا کرنا ہے ناکہ لوگوں کی قلم اور زبان پکڑنا۔
