(ہم دوست نیوز): مشہور و معروف عالم دین مفتی تقی عثمانی یوم آزادی کی سرکاری تقریب میں مردوں اور خواتین کے رقص پر برہم ہوگئے۔
مفتی تقی عثمانی نے سماجی رابطوں کی ویب سائٹ ٹوئٹر پر ایک بیان جاری کرتے ہوئے کہا کہ اہل وطن کو آزادی کی مبارک ہو ، تاہم انہوں نے مرکزی تقریب پر ناراضگی کا اظہار بھی کیا۔
مفتی تقی عثمانی کا کہنا تھا کہ ” یوم آزادی مبارک ہو! لیکن اس کی سرکاری تقریب کے دوران مرد و زن کا حیا سوز اور مخلوط رقص قوم کے زخموں پر نمک چھڑکنے کے مترادف ہے۔ کیا اس طرح سے اللہ پاک کی برکتیں نازل ہوں گی؟”
تھیٹر ڈرامہ “ساڑھے چودہ اگست” یوم آزادی پر پیش کیا جائے گا
انہوں نے مزید کہا کہ آج کے دن ” اناللہ واناالیہ راجعون” پڑھنے کو دل تو نہیں چاہتا تھا لیکن پڑھنا پڑا، انہوں نے کہا کہ کیا زمانے میں پنپنے کی یہی باتیں ہیں؟
خیال رہے کہ گزشتہ روز پاکستان کا 75 واں یوم آزادی جوش وخروش سے منایا گیا، اس موقع پر اسلام آباد میں جناح کنونشن سینٹر میں پرچم کشائی کی مرکزی تقریب منعقد کی گئی تھی جس کی ایک ویڈیو سوشل میڈیا پر وائرل ہوئی ہے ۔
وائرل ہونے والی ویڈیو میں جشن آزادی کی سرکاری تقریب میں مرد اور خواتین کے رقص پر حکومت کو تنقید کا نشانہ بنایا گیاہے۔
