ایڈنبرا: ( ہم دوست نیوز) ناسا کی جیمز ویب اسپیس ٹیلی سکوپ نے ایک ایسا سیارہ دریافت کر لیا ہے جس کے حوالے سے سائنس دانوں کا دعویٰ ہے کہ فلکیات کی تاریخ میں اس سے پہلے اس طرح کا سیارہ نہیں دیکھا گیا ۔
دس ارب ڈالرز کی لاگت سے بنائی جانے والی ٹیلی سکوپ نے زمین سے تقریباً چالیس نوری سال کے فاصلے پر موجود VHS 1256b کا مشاہدہ کر لیا ہے ، اس سیارے کا ماحول گرم مٹی کے بادلوں پر مشتمل ہے ، جو مستقل ابھرے رہتے ہیں، ملتے ہیں اور 22 گھنٹے کے دوران حرکت میں رہتے ہیں۔
سائنس دانوں کی ٹیم نے ٹیلی اسکوپ سے حاصل ہونے والے ڈیٹا کی مدد سے اس سیارے میں میتھین ، صاف پانی اور کاربن مونو آکسائیڈ کی شناخت بھی کر لی ہے ، سیارے میں کاربن ڈائی آکسائیڈ کی موجودگی کے شواہد بھی مل گئے ہیں۔
صرف پندرہ کروڑ سال پہلے وجود میں آنے والے اس سیارے کے متعلق سائنسدانوں نے دعویٰ کیا ہے کہ اس کی کم عمری بتاتی ہے کہ اس سیارے کا آسمان اس قدر طوفانی کیوں ہے۔
تحقیق کے شریک مصنف اینڈریو سکیمر کا کہنا ہے کہ کسی دوسری ٹیلی سکوپ نے آج تک ایک جِرم میں ایک ہی وقت میں اتنی خصوصیات کی نشان دہی نہیں کی ۔
