لاہور : ( ہم دوست نیوز ) پاکستان شوبز انڈسٹری سے تعلق رکھنے والی سینئر اداکارہ عتیقہ اوڈھو نے بالی ووڈ کنگ شاہ رخ خان کو ان کی نئی ریلیز ہونے والی فلم ’’ پٹھان ‘‘ کی کامیابی پر مبارک باد پیش کرتے ہوئے تعریفی پیغام جاری کر دیا ہے ۔
سوشل میڈیا سائٹ انسٹا گرام پر اداکارہ عتیقہ اوڈھو نے فلم اسٹار شاہ رخ خان کے ساتھ ماضی میں کھچوائی گئی ایک تصویر شیئر کرتے ہوئے شاہ رخ خان کی تعریفیں کیں اور ان کو سب کا خیال رکھنے والا شخص قرار دیا ہے ۔
سینئر اداکارہ عتیقہ اوڈھو نے تصویر کے ساتھ اپنے پیغام میں یہ بھی لکھا ہے کہ میں نے ماضی میں شاہ رخ کے ساتھ فلم ’’ دیوداس ‘‘ کے سیٹ پر ملاقات کی ، جس دوران اداکار شاہ رخ خان نے مجھے بے حد عزت اور پیار دیا ۔
انہوں نے اپنے ایک پیغام میں اس امید کا اظہار بھی کیا ہے کہ جلد ہی دونوں ممالک کے درمیان تعلقات بہتر ہو جائیں گے اور یہ ایک دوسرے کی فلمیں دیکھنے لگ جائیں گے ۔
