کرناٹک : (ہم دوست نیوز) بھارت کے نامور اداکار سدھارتھ ملہوترا اور اجے دیوگن کی فلم ” تھینک گاڈ ” بھی بائیکاٹ مہم کا نشانہ بن گئی ہے۔
تفصیلات کے مطابق بھارت کی ریاست کرناٹکا میں ایک ہندو انتہا پسند گروپ کی طرف سے فلم تھینک گاڈ پر پابندی لگانے کا مطالبہ سامنے آیا ہے۔
فلم ” تھینک گاڈ ” کے ہدایت کار اندرا کمار سمیت فلم کی پوری کاسٹ پر شکایت درج کروا دی گئی ہے۔
سینئر اداکار امیتابھ بچن کا اجے دیوگن سے انوکھا شکوہ
خیال رہے کہ فلم تھینک گاڈ کا ٹریلر 9 ستمبر کو ریلیز کیا گیا تھا۔ کرناٹکا میں ہندوؤں کے گروپ جناجاگروتی سمیتی کی طرف سے فلم کے ٹریلر پر اعتراض اٹھایا گیا۔
ہندو جناجاگروتی سمیتی کے ترجمان موہن گوڈا نے کہا ہے کہ اداکاروں کو ٹریلر میں دیکھا جاسکتا ہے کہ ہندو دیوتاؤں کا مذاق اڑا رہے ہیں ، ہم آزادیٔ رائے کے نام پر ہندو مذہب کے یاما بھگوان اور چتراگپتا بھگوان کا مذاق اڑانے کو برداشت نہیں کریں گے۔
خیال رہے کہ اس فلم کی کاسٹ میں سدھارتھ ملہوترا ، اجے دیوگن اور راکل پریت سنگھ مرکزی کردار ادا کریں گے۔ ٹریلر میں دیکھا جا سکتا ہے کہ اجے دیوگن بھگوان چتراگپتا کا کردار ادا کر رہے ہیں۔
