(ہم دوست نیوز): پاکستان کرکٹ ٹیم کے سابق فاسٹ باؤلر شعیب اختر کی زندگی پر بننے والی فلم راولپنڈی ایکسپریس کی کاسٹ کے لیے آڈیشنز کا آغاز کردیا گیا ہے۔
فلم راولپنڈی ایکسپریس کے آفیشل انسٹاگرام اکاؤنٹ پر آڈیشنز کے حوالے سے ایک پوسٹ شیئر کی گئی ہے، جس میں اداکاری کے خواہش مند 7 سال سے لے کر 70 برس کی عمر تک کے افراد سے درخواستیں وصول کی جائیں گی اور اس کی آخری تاریخ 20 اکتوبر ہے۔
بہت جلد چھری کے نیچے جانے والا ہوں، شعیب اختر کی ٹوئٹ
اس میں کوئی شک نہیں کہ شعیب اختر نہ صرف پاکستان بلکہ دنیا بھر کے کرکٹ شائقین کے لیے ایک سپر اسٹار ہیں، آج بھی وہ دنیا کے تیز ترین باؤلر ہونے کا اعزاز اپنے پاس رکھتے ہیں۔
راولپنڈی ایکسپریس کے نام سے مشہور ہونے والے شعیب اختر نے کئی مواقع پر بین الاقوامی کرکٹر بننے کے راستے میں آنے والی مشکلات اور اپنے تجربات کو بیان کیا ہے۔ شعیب اختر کے چاہنے والے ان کے اس سفر سے اچھے سے واقف ہوں گے لیکن ان کی زندگی کے مختلف پہلوؤں کو بڑی اسکرین پر دیکھنا یقیناً ایک شاندار تجربہ ہوگا۔
راولپنڈی ایکسپریس کے رائٹر قیصر نواز ہیں جبکہ فلم میں ہدایتکاری فراز قیصر انجام دیں گے۔
فلم کی کاسٹنگ کیلئے آڈیشن جاری ہیں اور اگر آپ بھی اس آڈیشن کا حصہ بننا چاہتے ہیں تو اپنی قسمت ضرور آزمائیں۔
