لاہور : ( ہم دوست نیوز ) پاکستانی سینما میں تاریخ رقم کرنے والی فلم ’’دی لیجنڈ آف مولا جٹ‘‘ 30 دسمبر کو بھارت کے صوبہ پنجاب کے سینما گھروں کی زینت بنے گی۔
پاکستان سینما کی رپورٹ کے مطابق بھارت کی سب سے بڑی سینما چین پی وی آر کی جانب سے فلم کی ریلیز سے قبل تشہیری مہم کا آغاز بھی کر دیا گیا ہے جب کہ بھارتی مشرقی پنجاب میں بھی فلم کا ٹریلر سینماء گھروں میں چلا دیا گیا ہے جس کے مطابق بھارتی پنجاب میں فلم 30 دسمبر کو ریلیز کی جائے گی۔
واضح رہے کہ ماہرہ خان ، فواد خان، حمزہ علی عباسی اور حمیمہ ملک کی مرکزی کاسٹ پر مبنی ایکشن فلم ’دی لیجنڈ آف مولا جٹ‘ پنجابی زبان میں فلم ہے جو کہ 1979ء میں ” مولا جٹ ” کے نام سے بنائی گئی فلم کا نیا ورژن ہے ، اس فلم کو ایک دہائی میں مکمل کرکے ریلیز کر دیا گیا ہے ۔
