کراچی: (ہم دوست نیوز) متحدہ عرب امارات (یو اے ای) سے مزید 2 طیارے پاکستانی سیلاب متاثرین کیلئے امدادی سامان لے کر کراچی ائرپورٹ پہنچ گئے ہیں۔
میڈیا رپورٹس کے مطابق پاکستان بھر میں طوفانی بارشوں اور اس کی وجہ سے پیدا ہونے والی سیلابی صورتحال کے نتیجے میں مختلف ممالک سے امداد کا سلسلہ جاری ہے۔ آج صبح بھی یو اے ای کے مزید 2 طیارے سیلاب زدگان کیلئے امدادی سامان لے کر کراچی کے جناح انٹرنیشنل ائرپورٹ پر اترے ہیں۔
یو اے ای کا امدادی سامان سے لدے 20 طیارے بھجوانے کااعلان
متحدہ عرب امارات کی جانب سے اب تک سیلاب زدگان کی امداد کے سلسلے میں مجموعی طور پر 16 طیارے کراچی پہنچ چکے ہیں، وزیراعلیٰ کے مشیر برائے بحالی، پاک فوج کے 5 کور کے افسر اور این ڈی ایم اے کے نمائندے نے امارات کے طیارے کے عملے کا استقبال کیا اور ان سے امدادی سامان وصول کیا۔
خیال رہے کہ اس سے پہلے جمعرات کے دن بھی 2 طیارے یو اے ای سے سیلاب متاثرین کی امداد کیلئے سامان لے کر پہنچے تھے۔
