(ہم دوست نیوز): نیٹ فلکس پر سب سے زیادہ دیکھی جانے والی فلم کون سی ہے؟
سی این این کی ایک رپورٹ میں بتایاگیا ہے کہ دنیا بھر میں نیٹ فلکس پر سب سے زیادہ دیکھی جانے والی فلم “ریڈ نوٹس” قرار پائی ہے۔
اطلاعات کے مطابق ریان رینلڈز ، گیل گیڈوٹ اور ڈوین جانسن کی اداکاری میں بننے والی اس ایکشن فلم کو دنیا بھر میں 32 کروڑ 80 لاکھ سے زائد گھنٹے دیکھا گیا۔اس سے پہلے یہ اعزاز فلم “برڈ باکس” کو حاصل تھا جسے دنیا بھر میں 28 کروڑ 20 لاکھ گھنٹے دیکھا گیا تھا۔
واضح رہے کہ پچھلے ہفتے نیٹ فلکس کی طرف سے اعلان کیا گیا تھا کہ ریڈ نوٹس نے اپنے افتتاحی دن پر ہی سب سے زبردست آغاز کیا ہے۔ ریڈ نوٹس کے سامعین کا اسکور 92 فیصد ہے۔
امریکی اداکار ڈوین جانسن نے انسٹاگرام پر خوشی کا اظہار کرتے ہوئے لکھا کہ “ریڈ نوٹس” اب نیٹ فلکس کی تاریخ میں سب سے زیادہ دیکھی جانے والی فلم بن گئی ہے جو اسے اسٹریمنگ میں نمبر 1 آل ٹائم مووی بناتی ہے۔
دوسری جانب اسرائیلی اداکارہ گیل گیڈوٹ کہتی ہیں کہ میں آپ لوگوں کو بتا نہیں سکتی کہ کس قدر اچھا محسوس کر رہی ہوں اور میں کتنی خوش ہوں۔
آپ لوگوں کی وجہ سے ہماری فلم نیٹ فلکس کی تاریخ کی سب سے بڑی فلم بن گئی ہے۔ آپ کی محبت کا مطلب پوری دنیا کی محبت ہے اور اس محبت کی ہمیشہ قدر کی جائے گی۔
