ریاض:( ہم دوست ویب ) سعودی ولی عہد محمد بن سلمان نے فیفا ورلڈکپ میں ارجنٹائن کے خلاف تاریخی فتح پر ملک بھر میں بدھ کو عام تعطیل کا اعلان کردیا۔
واضح رہے سعودی عرب نے قطر میں جاری فیفا ورلڈکپ کے میچ میں سنسنی خیز مقابلے میں فیورٹ ارجنٹائن کو ایک مقابلے میں دو گول سے شکست دیدی۔ ارجنٹائن جیسی مضبوط ٹیم کے خلاف یہ غیر متوقع فتح قطر میں جاری فٹبال ورلڈکپ 2022 کا ایک بڑا اپ سیٹ ہے۔
سعودی عرب کی ٹیم نے ورلڈکپ کے آغاز میں ہی نہ صرف اپنے ملک بلکہ پاکستان سمیت تمام برادر اسلامی ممالک میں خوشی کی لہر دوڑادی۔ قطر کے امیر نے بھی فتح پر اسٹیڈیم میں سعودی جھنڈا لہرادیا جب کہ سعودی ولی عہد سجدہ شکر میں گر گئے۔
یہ بھی پڑھیں: فیفا ورلڈ کپ 2022، قطر نے روس کو پیچھے چھوڑ دیا
سعودی عرب میں فٹبال ٹیم کی جیت پر جشن کا سماں ہے ،سعودی میڈیا کے مطابق حکومت نے کل یعنی بدھ کے روز عام تعطیل کا اعلان کیا ہے، کل تمام سرکاری و نجی دفاتر اور تعلیمی ادارے بند رہیں گے۔
