نیو یارک: (ہم دوست نیوز) امریکہ میں 10 برس قبل کھوجانے والی بلی دوبارہ اپنے مالک سے ملنے جا رہی ہے۔
نیویارک کے علاقہ لانگ آئی لینڈ سے دس سال قبل گم ہو جانے والی اس بلی کے متعلق اس کے مالک رچرڈ کا کہنا ہے کہ ان کی پالتو بلی جس کا نام ’مِیمی‘ ہے ، 2012ء میں ان کے رشتے دار کے گھر سے کہیں گم ہو گئی تھی۔ گھر والوں نے علاقے میں میمی کو بہت ڈھونڈا لیکن بلی کہیں نہیں ملی۔
لانگ آئی لینڈ کے علاقے بروک ہیوون میں قائم اینیمل شیلٹر کے مطابق گم شدہ بلی کو چند دن قبل انتہائی زبوں حالی میں لایا گیا تھا ۔
ادارے کی سپروائزر لِنڈا کلیمپفل کا یہ کہنا تھا کہ اس بلی کے بال بہت بری طرح سے اکڑے ہوئے تھے کہ زرہ بکتر کی ڈھال معلوم ہو رہے تھے۔
بلی کو صاف ستھرا کر کے اس میں سے مائیکرو چپ ڈھونڈی گئی تو معلوم ہوا کہ اس کے مالک رچرڈ پرائس ہیں ، جو اب اسپین میں ہیں۔
رچرڈ پرائس کا کہنا تھا کہ اس عرصے میں بلی پر کیا گزری ، اس سب کے متعلق صرف بلی ہی بتا سکتی ہے۔ آئندہ چند ہفتوں تک میمی ان کے رشتے داروں کے پاس ہی رہے گی اور آئندہ ماہ رچرڈ اور ان کی اہلیہ لانگ آئی لینڈ اپنے رشتہ داروں کے پاس جا کر اس بلی کو لے آئیں گے ۔
