( ہم دوست نیوز) متحدہ عرب امارات کے کراچی میں تعینات قونصل جنرل نے پاکستانی شہریوں کے لیے متحدہ عرب امارات کی ویزا پابندی کو ’فیک نیوز‘ قرار دے کر اس کی تردید کی ہے۔
پاکستان میں یو اے ای کے سفارت خانے سے منسلک ترجمان فرخ حسین کا کہنا ہے کہ اس معاملے یو اے ای کے قونصل جنرل بخیت عتیق الرمیثی نے ان تمام افواہوں کی تردید کی ہے اور کہا ہے کہ متحدہ عرب امارات کی حکومت نے کسی شہر ، مسلک ی زبان کی بنیاد پر ایسی کوئی پابندی نہیں لگائی یہ سب افواہیں اور پروپیگنڈا ہیں۔
ان کا کہنا ہے کہ ’جب جب پاکستان اور یو اے ای کے تعلقات بہتری کی طرف جاتے ہیں تو اس طرح کی افواہیں گردش کرنا شروع ہو جاتی ہیں، ان اطلاعات میں کسی قسم کی کوئی صداقت نہیں ہے ۔ پاکستان کے کسی بھی شہری پر متحدہ عرب امارات کے ویزے کے حصول کے لیے کوئی پابندی نہیں ہے ۔
ترجمان کا یہ بھی کہنا ہے کہ ’پاکستان کے شہری بلاتفریق یو اے ای کے وزٹ یا دیگر کسی بھی قسم کے ویزا کے لیے اپلائی کر سکتے ہیں اور ان کو ویزے دیے بھی جا رہے ہیں ۔
